真係唔寫出嚟唔得，我真係好睇唔過眼
外公入咗醫院，昏迷不醒，危險期一直未過
今日醫生話要拔喉，等佢自己呼吸
換句話即係等佢自然存亡
呀媽個邊有四兄弟，兩姊妹，仲有外婆
大仔名存實亡，人品冇人信任，大家都冇興趣同佢聯絡
二仔仔細老婆嫩，生活艱難顧慮多，難擔大旗
三女事事關心，但獨力難撐
四女事事關心，但處事能力唔高
五仔認錢唔認人，大家同佢反咗面
六仔講明唔孝順，得過且過
外婆年老體衰，上落困難，會過度緊張
（個人睇法）
阿公阿婆生咗六個仔女出嚟，睇落齊齊整整，人才濟濟
而家老來生病有事，真係一眼睇晒眾生相
兩個仔各自為政，睇兩眼就已經走咗
其餘剩落嚟嘅，夾埋子子孫孫十幾個
原來大家嚟到都係傾吓偈，聚吓舊
「好耐冇見喎，瘦咗喎，呢排撈緊乜呀⋯」
入到病房望兩眼，出嚟講吓笑，探完，去食飯啦
得返嗰兩個女最關心呢件事，不過又唔知點做，樣樣嘢都跟得唔足
啲差佬就耍太極，護士就做通知，醫生唔知幾時先見到
阿公就瞓喺張床度聽到講唔倒
醫生話佢唔會醒，要維持落去睇佢自己身體機能
大家係唔知冇呢個生離死別嘅意識，定係唔知當佢咩關係
大嘅繼續講佢哋啲錢銀瓜葛，細嘅自己坐埋一邊打機
件事冇人出嚟主持，大家各有各諗法
大佬走咗佬，二佬唔識出嚟主持頭家
最年青力壯嗰個大孫都係諗住見步行步
坐低傾，「我唔得閒架，唔駛睇佢啦，等佢走咗咪過嚟囉」
呢啲就係大家嘅意見
醫生話約佢哋禮拜四見面
呢個話要返大陸，嗰個要返工，嚟嘅得返兩個女
我唔明白點解自己老豆有事，可以當小事
「等佢去咗咪去拜吓佢，第二時你住得近，你代我去拜佢」
呢啲咁嘅說話都講得出
如果佢係自然咁去嘅，我諗我會覺得安落啲
不過呢單係交通意外，件事聽聞係俾架貨車撞倒
啲差佬話佢有查，但係冇進度，負責同事今日放咗假
仲以為佢只係輕傷，話等佢醒返同佢落份口供，個司機就繼續揸車
阿公係去都去得不明不白⋯
坐埋一枱食飯
大嘅傾吓偈講吓笑飲吓啤酒，得把口問「聽日點架」
細嘅插住耳筒打機，飯嚟食飯，餸嚟夾餸
咁樣就係一家人
只能慶幸我唔係姓甄，我幫到幾多就幾多，做我可以做到嘅
我只係關心我阿媽、阿婆、阿公
其餘嘅，我冇興趣知
對唔住，你講啲笑話我完全笑唔出