最近幾個月有一個背囊品牌，銷量上升得誇張，去到港九十八區，上至師奶，下至學生妹，中佬、後生仔都有人孭，仲喺深水埗見到有此款式翻版出售，證明此袋流行程度令人趨之若鶩，亦證明此袋的用家層面並不一定是品味之選。呢個袋嘅普及蔓延，令我覺得呢個社會好恐怖。
情況有如有一期曾經流行 LV, GUCCI 等幾個名貴手袋品牌，實在講唔出點解要一人孭一個，一眾港女繼而大陸遊客衝去廣東道追捧。論款式，絕對唔係美觀﹔論設計，只係見到用 logo 密鋪平面嘅共同特色，一式一樣﹔價錢，可能係被追捧嘅原因，證明攜行者嘅購買力，但絕對損害緊攜行者嘅衣著品味。
至於今次呢個日本背囊品牌，其款式算係多花紋選擇，仲會推陳出新﹔設計係比較新穎，令人一眼就認出呢個品牌﹔間隔實用，滿足到用家實際需要﹔價錢相對符合大眾水平。以一個相宜價錢買入一個具設計反映個人品味而又實用嘅背囊，在潮流未開發嘅時候其實都算係 good taste，但呢個風氣唔知咩原因被各界追捧，品味層次頓時變得模糊俗套。最大弊處係呢個袋無論花紋點變其款式設計始終不變，即是說任何人孭呢個袋其實都係孭緊同一個袋，如果花紋一樣，調亂之後你根本無法分辨哪個袋屬於你。於是一街都係師奶、學生妹、中佬、後生仔孭住「又係呢個袋」。諗起都覺得發。
恐怖嘅係，完全理解唔到點解會有一班來自唔同背景層面嘅人選擇同一個款式嘅袋，接受到自己同唔同背景層面嘅人擁有共同嘅口味，咁其實代表住啲乜嘢？點解佢哋會覺得呢個袋襯佢哋，而又可以襯落幾廿萬人身上？點解人既要突顯自己嘅不同，例如喺唔同場合爭取表現上位，又要追求擁有同大眾擁有一模一樣嘅物質生活？到底佢哋係有要求定係冇要求，我睇唔透…
如果話香港人係有一種「人有我有」、「唔執輸」、「人哋試咗，終於輪到我試」嘅羊群心理基因，我覺得呢部分嘅香港人真係同羊冇咩分別。要追求一個多樣性平衡嘅社會生態，在養住一班羊群情況之下，只會引嚟豺狼當道，任意宰割。羊只會成為食物鏈嘅底層，而又甘於奉獻呢一條金字塔般嘅食物鏈。
