過去總是美好

今天是陳僖儀離世三週年。我將呢個事件記錄在自己的行事曆，每年重複一次。（係，我係會將一啲大小公眾私人歷史事件記錄，到時到候提醒自己。）

「常錯覺半空的飛鳥是我」其實呢句歌詞都幾令我印象深刻，可能因為佢可以應用喺好多場合。

過去總是美好，其實好明白，Sita 出事嘅時候只係剛剛起步，有一兩首歌出名，唔算係咩樂壇巨星。但係佢嘅離開確實為樂迷帶嚟震憾、哀傷，我哋總係會認為，一個人突然離開，好惋惜，如果今日佢還在嘅話，世界會幾美好。《忘川》呢首歌，因為再唔會聽到佢嘅新歌，成為佢嘅絕響。於是佢嘅美好一直停留喺佢離開一刻，就係佢生命最青春，事業輝煌嗰一刻。我係悲觀者，嗰一刻好美好，但係唔代表會一直以後都美好，有可能更好，亦有可能已經是人生一個高峰。正如一個人嘅美貌，喺廿幾歲時最美艷，過後皮膚只會衰老，增加嘅可能係歷練嘅韻味，但唔再係青春嘅朝氣。無論如何，嗰一刻已經過去，仲愈離愈遠。

我哋停留喺眷戀過去嘅美好，因為活在當下，有太多唔想接受嘅現實，對未來又充滿憂慮與恐懼。呢個係恆久不變，唔同年代嘅人都一般抱有嘅心態。如果可以返到嗰一刻，一切停留喺你認為美好嗰一刻，世界唔需要流動⋯陳百強唱住「閒時留在過往中打圈，輕撫瑣碎的舊片段，仍是那麼眷戀⋯」譚詠麟又唱「誰可以將光陰倒轉，再讓往日復現眼前⋯」。係就好，但係人就係要追求突破追求新鮮，又要新科技，又要聽新歌，又要追新劇。我明白，呢種停留嘅心態會令人不思進取，沉溺而無法抬頭，展望將來。但係問題係，究竟往日嘅人生活開心啲？定係今日嘅人開心啲？往日嘅人會唔會又覺得再遠古啲會開心啲？

或者人類根本沒有「進步」，只係重蹈覆轍，歷史重演。「進步」只係一個慫恿人尋求開心嘅幌子。而家社會嘅現象唔係咩新鮮事，只係人善忘，人冇讀歷史，人不斷畀希望自己。但係睇真啲，人性其實無變，善惡之間沒有多咗善定惡，哲學理論亦一早經歷思辨之旅。錯覺令人覺得科技進步，文明進步，我嘅努力令我擁有更多。其實廿年前嘅雀仔飛得開心啲？定係今日喺街見到嘅雀仔飛得開心啲？將來，甚至下一代，會唔會比今日飛得開心？