記低上個禮拜去「旅行」去咗邊
day 1
返大陸，惠州探親，呆坐，睇柴九，夜晚瞓覺俾蚊咬
day 2
去咗深圳布吉搵舅父，落車嗰時淋住雨過天橋，同狗仔玩，吸二手煙
呆坐，夜晚食所謂粵菜，實質唔知咩嚟，夜晚俾蚊咬，冇風扇又冇冷氣
day 3
坐車返羅湖，坐大巴去番禺，途中個司機開到肯定超過 120 咪，左 cut 右 cut，狀甚恐怖，驚心動魄，完全唔敢瞓覺
跟住坐公車去星河灣，點知去咗星河灣國際公寓，要搭穿梭巴士過返酒店嗰邊
四點幾要搵嘢食，就咁行出去啲路旁嘅石壆，行咗去兩條公路匯合處，要同啲車鬥快衝過去，有如搵命搏
根本嗰個時間冇嘢食，上咗架的士兜咗我哋去好遠，聲稱嗰道先有好嘢食
嗰道叫洛溪食街，好似真係有好多唔同風味，不過唔係食野味就係食辣嘢，我發覺原來成個中國咁大大部份嘅風味都唔啱我，我都係鍾意食西餐多啲
佢哋要成五點先會開門，呆等超過半個鐘，好彩食嗰間東北美食都算 ok
跟住諗住搭返的士返酒店，點知行咗成三四條街都冇的士
跟住返到酒店個心先定返啲，有免費接駁車載我哋去長隆睇馬戲
馬戲都幾精彩，環境唔算太差，由於係行程一大重點，所以算係幾滿意
之後返去又有車接，成架車都係得我哋四個人
睇柴九、謎，浸浴缸，飲咗罐啤酒，借咗隻 dvd 嚟睇，點知畫面唔啱嘴形，夾硬要聽法文先搞得掂
day 4
食自助早餐，嘢食 ok，不過我都係鍾意香港嗰啲早餐，有包有蛋有碗粉
原本諗住去廣州食晏，點知成日係咁落雨，叫咗架的士車我哋去返番禺客運站
點知上咗車個司機坐地起價，我哋又喺返公路嘅天橋底落車，截咗成半個鐘都冇的士
結果有個揸私家車嘅見到我哋傾掂數俾我哋上
返到羅湖又話要去華僑城嗰邊食嘢，搭地鐵去到又搵唔到
企咗喺地鐵站出口等咗成半個鐘
嗰間嘢食上海嘢，都唔差嘅，不過嗰時我已經筋疲力盡，重要俾人怪責，非常委屈
終於可以回程返香港，返到嚟一天都光晒！
總括嚟講，旅行唔係唔鍾意，不過又要顧住佢哋啲魯莽嘅衝動同埋唔理智嘅決定，每次都要我用心咁鋪排一吓我點睇佢哋咁又有乜問題，事後重要俾佢哋反咬一口，真係唔知咁辛苦為乜
最滿意都係揀咗睇馬戲同埋間酒店，好在佢哋啲服務同表演都幾有質素，有啲出乎意料
真係好怕同佢哋外出旅遊，同埋好怕再去啲咁唔文明嘅地方，啲生活好難適應
好想自己真正咁去一次旅行
旅行原本唔應該係咁
No comments:
Post a Comment