關於送禮

冇計算住各方親朋好友會預備幾多禮畀我哋，但係知道「依照一般傳統」，為表心意我哋都會預備或多或少禮物或者利是，送畀一對新人。

我哋兩個都有一個理念，簡單講就係覺得大家唔使送甚麼禮物或者「人情」畀我哋，表面原因就係，唔好「禮尚往來」呢種社交模式。我哋再深入探討，提到「物質主義」，「迫人哋接受你所送出的禮物」呢啲問題。我諗大家都有試過玩交換禮物接收咗啲用唔著或者唔鍾意嘅物品，正面啲諗就係「人哋一番心意，送贈者嘅選擇代表住送贈者嘅為人特色」，雖然就個別事件咁睇，係唔值得介懷，但係宏觀少少睇，點解整體人群社交會以買、送禮物嚟表達心意呢？有冇一種更直接或更有意義嘅表達方式呢？

「人情」方面，我哋邀請各位出席我哋嘅婚禮，其實係一心一意想將我哋嘅喜悦分享畀大家，並冇諗過要任何金錢上嘅交收。場地模式使費係我哋嘅選擇，我哋應該自己負擔。再者，我個人實在好批判呢種不明文規定「嚟出席要畀『人情』嘅習俗」，我完全唔認同「人情」係可以以一份金錢去 fulfill。如果我只係「邀請」你嚟，而唔係「請」你，我應該要講清楚呢餐每人夾幾多，咁樣對大家都公平。

或者我咁講係挑戰緊好多人嘅價值觀，或者直接得罪咗一啲人，或者有啲人接受唔到，或者係我太偏激…，請容許我講聲唔好意思，我真係唔想隨波逐流，我係想每件事都諗一諗背後嘅故事同意義，咁樣做起嚟先可以理直氣壯，對得住天地人。呢個亦係我一開始搞呢個活動嘅理念之一。

可能係遲咗少少，如果可以的話（唔得都冇所謂嘅），我會建議將呢份心意轉化為慈善力量，幫助社會上嘅弱勢個體。個人嚟講比較支持「動物權益」同埋「保護地球」嘅組織。多謝。