新年願望

首先，時間本身無起點亦無終點，年月日星期節日呢啲都係曆法係人定。時間嘅週期，例如四季潮汐，呢啲就係天定。

新年，咪又係各處鄉村各處例，何謂新一年？曆法又可否套用於其他地區？

恭喜發財、身體健康、心想事成、萬事如意，呢啲「祝賀詞」個個都講到朗朗上口，又有幾多個夢想成真？夢唔係發就有，係要一步一步實踐，想身體健康，要注意飲食，想心想事成，要有實踐計劃，唔係講得多就會有。

再者，生老病死係必經階段，得失亦非恆久必然。必須明白，有始必有終，有起總有跌。萬物係一個循環機制，有因就有果，你生財就有人破財，如你意就不會如人意，何以追求自身歡愉而忽略他人所捨，反映呢種觀念都係利益心態。

依我睇，更希望各人有面對無常嘅勇氣同器量，得意時要懂得珍惜，失意時要懂得面對，幸福本來就在身邊，最好的尚未來臨。咁先係新年快樂之道。