complexity of friendship

考完 ue 同 pure
好耐冇打過 blog
唔係唔想打, 唔係冇野打
呢排好少用電腦, 同佢好似好疏離咁
所以心都冇交出黎

ue 既感言就係
費最少力氣準備既一科
冇嘜壓力, 就咁去考, 一切隨緣

pure, 有 d 唔甘心
唔識做既通通係 time's up 一刻之後識做
其實份卷唔可以話難...
實在唔係我最佳狀態既發揮...

唔講考試...
其實呢排心情都持續地 down
當我 down 既時候, 你就會發覺同平時有 d 唔同
即使你講笑話, 我都未必想笑...

經過連月來與人鮮有接觸既日子
一個人獨自胡思亂想
我發覺人與人既相處真係一門好深既哲學
我嘗試控制自己既思緒感情
維持我唔想改變既態度
倒頭來, 會換來反效果
有 d 朋友, 你會同佢食飯, 但係你地唔多講野
有 d 朋友, 你同佢食飯, 有講有笑, 但係明顯係笑話居多
好多時候, 都受客觀環境決定左好多野
但係有 d 野, 即使時間, 空間既改造, 都改變唔到
有 d 朋友, 好少見面, 說話唔多, 但係一講起上黎停唔到, 傾到凌晨, 傾到聽朝
有 d 朋友, 好少見面, 一見面就講個唔停, 即使充斥笑話, 仍是感到開心滿足
有 d 說話, 你會同呢個講, 有 d 同個個講
你會知道邊個會聽邊個會明你講咩, 會同你一齊笑, 會一齊經歷一段日子
有 d 朋友, 即使你好想同佢做好朋友, 不過始終限於打招呼問候幾句
有 d 朋友, 同你係真心精神上交往, 大家有默契, 識得珍惜
有 d 朋友, 好少見面, 你會成日想再約多一次, 一齊玩, 懷念那次暢懷傾吐

我覺得呢 d 分別
唔係在於時間同空間既變數
係真係你同我心靈交往既結果
有好幾次, 同呢 d 朋友冇諗過可以咁 friend
不過經過幾次相處之後, 真係發覺大家岩 channel, 嘴形夾
而且對方都覺得同你岩傾
係呢 d 交往上, 多年前, 我冇諗過有咁既收穫
今日, 我真係感到好滿足
有 d 時候, 你會對某某要求高了點, 覺得好似唔舒服
不過當佢唔係你身邊一日, 你又會覺得囉囉攣
就係呢種奇妙感覺, 令我驚嘆人際關係之淵博哲學

近日聽 903 nokia music talkie
發覺原來呢個故事唔只係我既故事
原來世界上十幾公里之外的某某都有同樣遭遇
遺憾係如何發生? "人來人往", "let down", "808"...
原來我唔係不幸一個, 而係不幸中之一個

好多時候諗返以前
form1 form2 逐年數
好多小事大事都難以忘記
大概好多都只係我一人既感慨, 對其他人黎講, 沒甚麼大不了
尤其一 d 片段場景, 我會好深刻諗返起
唔同時間裡, 我同唔同人食 lunch
打籃球, 踢足球, 遊英國, 掟粉擦, 公園玩...
一幕一幕, 就好似菲林係眼內掃過
而家, 大家都各散東西
有 d 見面打個招呼, 有 d 已成陌路人
有幾多個到而家仍然不時見面, 談談近況!?
"然後樹老, 身體老, 情從來沒有老
可惜這個城市裡, 從今找不到你..."

返返黎而家
有時候, 有 d 說話好想即時同某某講
不過時間空間限制, 我將佢藏係心底
一直堆砌起黎, 留俾自己消化
唯有電腦呢部, 多年來一直陪伴我成長
我有咩都留返同佢講, 大概佢係最清楚明白我一個
今晚佢又幫我分憂解悶, 聽我心事
我的電腦, 多謝你!